E d’auti vèrsi sense amor

As que estimen

A Tieta

Amor mèn, amor mèn.

E era paraula sòne en uet. E s’està solet.

Vicente Aleixandre

Parlam d’amor.

Der amor que botge eth mond, der amor de mair, der amor platònic, der amor quan volem díder sèxe. Soent, mès damb rason, descuedam qu’aquera madeisha quimica qu’aumplís er estomac de parpalhòles, mos uede es uelhs e eth relòtge.

 Parlam de desamor.

Deth desamor per abséncia, deth desamor implícit en desenganh, deth desamor coma nostalgia, deth desamor dera vida. D’aqueth aute tipe d’amor que, encara que còste o hèsque mau, tamben botge eth mond.

 Quan mos enamoram, ac hèm damb eth còr. En desenamorar-nos, ac intentam damb eth cervèth, volent racionalisar tot sentit ath sentiment.

 E, se er amor a forma de còr, coma ei eth desamor?

Teoria Dera Sublimacion

Concèpte: Sus era sublimacion

Pas de sòlid a gas
Sense passar per estat liquid

Teoria: Sus eth papèr

Passar es nòsti dies –fase solida
A un ètern rebrembre –fase gas
Sense plorar –fase liquida.

Practica: Sus er anima
Era fase solida non artenh a evaporar
Dèishe un poso ena memòria
De temps fragmentadi, dies dividits
Insolubles e indelebles

 Sonque era sang arrossègue aguesti bricalhs
Coma pèires d’arriu
Enquia era mar; abandonant-les
De nau, en hons
A on quèn per ua auta densitat.
Metàstasi extesa dejà
Aquiu on arribe eth plasma

Aquerò qu’ei superficiau passe a gas
Se barrege damb oxigen deth sospir

E era manca de volentat.

Toti es tòns tus

catalisen era reaccion
Accelerant eth procès invèrs
E eth començament der ètern rebrembe
S’expandís, tòxic, inflamable
Lacrimògen

Aparicion de fase liquida

Non i a sublimacion

Tornar a començar

Concèpte, teoria, practica

Hipòtesi, conclusion

Paradoxa

Morissen es mèns punets, atropelhadi
Ena autopista dera distància
Linea recta, èterna e infinita
Que mos unís quan vies
E mos aluenhe quan huges

Pagant es peatges deth temps
Se deshèn es fibres deth vent
Que tèishen eth papèr qu’embolique
Es paraules, es que t’escriui
Es que te digui, es que cari

LÈRMES TRADIDORES

Lèrmes tradidores, qu’an escrit
eth tòn nòm damb era sua sau,
Horaden es carilhons, daurint-se camin
Enquiath trinc que non sagne
                                             mès escòtz

Cicatritz de non auer-te mès a prop

De non auer-te

Resvenja

È trapat en un aute còs
Era resvenja peth castig
Que m’a imposat eth destin
Que non me dèishe mès que  soniar
damb tu

Ues autes mans e uns auti uelhs
Amorassen eth mèn còs,
Que non se sent culpable
Damb un estranh escuerçant
Er abisme que mos separe

Autes mans e auti uelhs, didia,
Son es que s’aprenen aguesti cornèrs
E, ath sòn torn, son es mies mans e uelhs
Es qu’imaginen ua auta pèth, d’auti pòts

VIA LACTEA

Era Via Lactea brodada as linçòs
E un pedaç d’Univèrs
Esclairís cada net
Tota era abséncia

 

uet inexplicable

 

Que se daurís jos es mèns pès
Deishant quèir er a
                                n
                                    i
                                      m
                                           a

Entath hons deth nonarren

Hantauma

Vestit damb eth tòn còs e era tua veu
Er hantauma deth passat
A vengut entà quedà-se,
Menaçe damb non anar-se jamès
Entà rebrembà-me cada menuta
D’aguesta net
                        e de totes es nets
Qu’un viatge t’auí a pròp
Tan a pròp que non i auec distància

Dilhèu siguec un instant
Dus sospirs o tres paraules

Siguec sonque un instant

                                    e non semblèc tota ua vida

SABATES ENA PÒRTA

Baishar ara plaja e deishar es sabates
                                                       ena pòrta

Escríuer ena riba eth mèn nòm,
que se l’empòrten es onades,
qu’eth mar me retorne ua iniciau
milhor acabada.

Diboishar damb es pès aqueth espaci
                                                        atemporau,
cercle deth que sò centre,
on es espiraus deth temps pèrden sentit.

Ans oritzontaus, verticaus, parallèls,
perpendiculars, ara fin

Construir relòtges de sable damb es mans,
Sénter es etèrns segons
Escórrer-se des dits,

Dilatar eth temps ath mèn talent.

Concentrar era uelhada en pè deth cèu
Moldejar-lo, alongar-lo, desdiboishar-lo.
 

Baishar ara plaja e deishar
es sabates ena pòrta

Descauça.

E es claus metudes.

Vau a odiar-te
                      De laguens entà dehòra

Dant-li as audèths
Es mores que deishès en jo
Perqué non vau a tornar
A tu

                                      Vau a odiar-te
De dehòra entà laguens

Perqué aquerò que non a nòm
Existís
Tu li as dat còs
                              Forma e contengut

Quan n’aprena, vau a odiar-te
                              En totes es virades

Un aute viatge, exercicis ena plaja

Somes e rèstes en sable, abac de calhaus
e veires escurats
Per aqueres onades que vien, chaupen

e se’n van,           se’n van,           se’n van

                                                      Entà tornar

                            tornar

tornar

Coma nosati, coma tu, que vas e vies

E te quedes
Banhant-me damb aigua de mar
Plia de pèrles de sau e miralhs

Sonque serà, promete-me, una petita mèrca
Entà non desbrembar
Qu’auem après era leçon

                                         Entà non desbrembar

Era mòrt me treiguèc a barar un vals
Portaua metut eth milhor vestit
Es sòns pès tamponejauen damb es mèns
Despolhadi

Eth sòn nere e eth mèn blanc trincat se barrejèren
Mos convertirem en siluetes sinuoses
Jogant ar auba, botjant-se ath compàs
Confonent as ombres dera vida

Doça e sofla mòrt
Era que m’abraçaue era centura
Era que m’estretaue damb eth uet
Era que m’anestesièc damb er alend

EPILOG   

INSTANT 1  

  INSTANT 2

DES IMATGES E ILLUSTRACIONS   

Portada: “El amor profundo”, Tom14

Teoria Dera Sublimacion: “Aprendiz de todo, maestro de nada”, Haciendo El León

Autopista Dera Distància: “Heart Of Stone”, Panteha

Lèrmes Tradidores: “Cardiograma”, Sandra Sandoval

Resvenja: “Corazón en un puño”, Santiago Inat

Via Lactea: “Nebulas Corazón y Alma”

Hantauma: “Tripas corazón”, Francisco Lemos

Sabates Ena Pòrta: “Corazón viajero”, desconeishut

Òdi: “Tubs al cor”, desconeishut

Exercicis Ena Plaja: “Anatomia”, Leonardo Da Vinci

Darrèr Balh: “3-D computational model of blood flow in the heart”, Charles Peskin e David McQueen

Radiografia d’un instant (1): “Otra vez esa sensación”, desconeishut

Radiografia d’un instant (2): “Lucrecia”, desconeishut

Volver atrás